Интер нема да добие попуст за наследникот на Онана

Интер ќе направи сериозни промени на голманската позиција, поточно од клубот си заминуваат двајцата асови кои го чуваа истиот минатата сезона Андре Онана и Самир Хандановиќ.

Хандановиќ по долго време ја заврши приказната со „нероаѕурите“, додека Камерунецот ќе биде продаден во Манчестер Јунајтед или поточно калчолигашот не можеше да ја игнорира големата понуда за неговите услуги од премиерлигашот.

Повеќе од јасно е дека европскиот вицешампион мора да реагира и како прва цел е искусниот Јан Зомер од Баерн Минхен. Наводно Швајцарецот е спремен да се пресели во Милано, па сега останува само клубовите да си подадат рака. Според Џанлука Ди Марзио, бундеслигашот нема намера да му даде никаков попуст на Интер, поточно нема да прифати помалку од 6 милиони евра колку што изнесува откупната клаузула.

Во таборот на италијанскиот прволигаш се надеваат дека ќе ја намалат сумата, ама се подготвени и да ја платат клаузулата ако нема договор оваа седмица.

Клубот од Милано исто сака да го ангажира и членот на Шахтјор Доњецк, Анатолиј Трубин, меѓутоа за таа операција се потребни повеќе финансиски средства.