Храбриот Алкалоид покажа потенцијал, но го заврши со пораз дебито во Европа

Алкалоид како актуелен ракометен вицешампион на Македонија се избори за дебитантски настап во Европа, а оваа вечер ја имаше својата премиера во Лигата на Европа која ја организира ЕХФ.

Момците на Кирил Лазаров покажаа дека можат да се носат и на највисока сцена, но сепак скапо го платија неискуството и големите падови кои ги имаа во одредени делови од првото и второто полувреме.

„Црните дупки“ во клучните фази од двете полувремиња се покажаа како клучни за поразот од 26:31, со кој тимот од Автокоманда го отвори своето прво европско патување од своето постоење.

Историската вечер донесе многу лекции за младите играчи на македонскиот селектор, но со исклучок на падовите, имаше и добри моменти кои само го покажуваат потенцијалот .

Војводина ја направи клучната разлика на средина на второто полувреме кога поведе со 26:19 благодарение на серијата од 5:0, па иако Алкалоид возврати со иста мера и се врати на минус два, на крајот остана без сила да се бори за голем пресврт.

Иван Џонов со осум реализации беше најдобар поединец кај Алкалоид, исто толку голови постигна и Воркапиќ од противничкиот тим, додека Бинго и Митев го завршија мечот со пет голови.