Директор на Милан: Никој во клубот не зборувал за отказ за Пиоли

Стефано Пиоли му донесе скудето на Милан по долг период, но веќе втора сезона по ред „росонерите“ не можат да фатат приклучок со екипите како Наполи и Интер, кои издоминираа во претходната, односно актуелната сезона.

Таквиот развој на настаните и елиминацијата во групната фаза на Лигата на шампионите ги засилија шпекулациите дека тренерот ќе добие отказ, но извршниот директор Џорџо Фурлани има малку поинаков став за статусот на Пиоли.

– Досега имаме добра сезона, но за жал и овојпат има екипа која ги надминува очекувањата.

– Лани тоа беше Наполи, сега е Интер, но не треба да заборавиме дека Пиоли го врати Милан во Лигата на шампионите и го одведе до титула.

– Често заработува критики, но истовремено постигна значајни резултати за клубот. Никој во клубот досега не разговарал за негов отказ, а оваа сезона не треба да се оценува според она што ќе се случува во продолжение од Лига Европа или на градското дерби со Интер, – истакнал Фурлани.