Ван Дајк остана мирен во 93. минута и ја приближи Холандија до ЕП (Видео)

Холандија беше за нијанса подобар ривал од Грција во текот на целиот меч, но на крајот победи благодарение на пеналот кој беше досуден во корист на „лалињата“ во 93-та минута.

Селекцијата на Роналд Куман имаше можност да поведе уште во првото полувреме од белата точка, но тогаш Вегхорст беше прочитан од Влаходимос и резултатот остана оној почетниот.

Грција делуваше уште постабилно во второто полувреме со замените кои ги направи Појет и се чинеше дека е на добар пат да освои бод, но сепак во судиското продолжение беше досуден нов пенал.

Овојпат одговорноста ја презема капитенот Вирџил Ван Дајк, кој со мирен удар погоди за 0:1 и ја приближи Холандија до нов настап на Европските првенства.

Холандија и Грција сега имаат по 13 бода на табелата, но „лалињата“ имаат натпревар помалку и подобар распоред до крајот.