ТФТ и Куманово ќе играат квалификации за ФИБА Еврокупот во Русија и Холандија

Екипите на ТФТ и Куманово се одлучија оваа сезона да се испробаат на едно повисоко ниво и да се натпреваруваат во ФИБА Еврокупот, меѓутоа за да стигнат до главниот дел ќе мора успешно да ги минат квалификациите.

ФИБА ги објави градовите домаќини на квалификациските турнири и тоа се Гронинген, Софија, Краснојарск и Парну. За нас или поточно македонските клубови најважни се случувањата во Холандија и Русија.

Куманово ќе игра во Гронинген и ако во првото елиминациско коло биде подобар од Свонс Гмунден од Австрија тогаш во полуфиналето ќе се соочи со домаќинот Донар Гронинген. Во овој дел се уште Бенфика и Волунтари.

ТФТ пак го очекува долго патување во Русија и тоа во Краснојарск. Таму клубот од Тафталиџе ќе излезе на мегдан Натуртекс-СЗТЕ-Сегед од Унгарија, во случај да нашиот претставник слави тогаш ќе се соочи против Меди Бајројт.

Дел од турнирот се уште Енисеј и Хапоел Хаифа.

Инаку сите турнири ќе се играат помеѓу 28. септември и 1. октомври, со исклучок на Турнирот „Б“ во Софија, кој ќе започне на 29. септември бидејќи нема четвртфинале.