Непријатност за Иџе во Шпанија: Имав страшен судар, тоа се трките (Видео)

Игор Стефановски Иџе имаше спектакуларно издание на трката во Португалија, но за жал, денеска самиот јави дека имал незгодно излетување на третата трка на Европското првенство на ФИА кое се вози на ридски патеки.

Македонскиот автомобилист имал непријатен судир со своето Хјундаи на трката во Астурија, односно комплетно излетал од патеката откако загубил контрола на задниот дел.

Трката наречена „Субида ал Фито“ нема да му донесе бодови на Стефановски на првата трка, а многу мали се шансите Иџе да настапи и на втората трка која е предвидена во Шпанија овој викенд.

– За жал тоа се трките, се случуваат и вакви работи. Кога возите на лимит се случуваат вакви работи, на една кривина пред крајот ми фати задниот дел од автомобилот во трева.

– Имав страшен судар, се надевам дека ќе го спремиме возилото за наредната трка, – изјави Иџе.