Надал: Нема да освојам повеќе грен слем титули од Ѓоковиќ, но……

Рафаел Надал денеска се обрати пред шпанските новинари и соопшти вест која ги израдува сите негови фанови, односно за првпат со сигурност навести дека ќе се врати на тениските терени.

Шпанецот до пред неколку седмици не беше сигурен за својот кам-бек на терените и не знаеше дали воопшто ќе биде во можност да се натпреварува, но во последно време направи голем исчекор на тренинзите и тоа влеало голем оптимизам во неговиот тим.

Надал е среќен што во моментов оди во правец кон враќање на терените, а како што вели самиот, негова цел нема да биде да го брка грен-слем рекордот на Новак Ѓоковиќ кој оваа година го надмина Шпанецот и стигна до бројката 24.

– Знам дека ќе ми биде многу тешко да се вратам на највисоко ниво на тенис после толкава пауза, но ако не верував дека ќе бидам компетитивен, воопшто немаше да направам толку тешка работа изминативе месеци, воопшто немаше да се трудам.

– Нема да освојам повеќе грен слем титули од Ѓоковиќ, но ќе си дадам шанса на себе да уживам повторно на теренот и да се забавувам на местото кое најмногу го сакам, – изјави Надал.