Медведев нема да калкулира против Алкарас: Ѓоковиќ е одличен пример за мене

Данил Медведев успеа да оствари уште една чиста победа на завршниот турнир во Торино, поточно по Андреј Рубљов го реши и Александер Зверев и на тој начин обезбеди пласман во полуфиналето на овој Мастерс.

Русинот во завршното коло од групата ќе се соочи со Карлос Алкарас, играч на кого пак му е потребен триумф за место во следната фаза. Медведев најави дека нема да калкулира и ќе направи се за да дојде до 3-0 и со тоа да дојде до уште поголема самодоверба пред завршницата на овој настан.

-Како прво, тоа е нормално. Тој сака да продолжи понатаму. Не ги знам калкулациите. Секако ако го победам Карлос, ќе биде добро за него. Тоа е нормално. Јас би го направил истото. Ќе дадам се од себе против Карлос. Нема да биде лесно. Ама тука, брз терен, може да биде интересно. Секогаш е прашање, се разбира дека не сакате да играте тајбрејк во трет сет по три и пол часа, а потоа да играте повторно следниот ден.

-Во моментот кога ќе се опуштите и ќе си кажете дека натпреварот ќе биде полесен, го губите ритамот. Така функционира тенисот. На пример, Новак минатата година одигра физички многу тежок натпревар против мене. Можеше во еден момент да каже: „Јас сум прв дури и да загубам“. Но, тоа не беше. За мене е одличен пример да дадам се од себе во петок, -порача Данил кој има учинок 2-2 во дуелите со Алкарас.