Карлос не може да крене глава: Алкарас претрпе нов пораз на стартот на завршниот Мастерс (Видео)

Карлос Алкарас дефинитивно е далеку од формата која го красеше во најголем дел од 2023-та година, а доказ за тоа добивме и на мечот на кој требаше да има голема мотивација за триумф.

По поразите од Григор Димитров и Роман Сафјулин, Карлитос денеска го претпре и третиот неуспех во низа, бидејќи „црвената група“ на завршниот Мастерс во Торино ја започна со пораз од Александер Зверев.

Алкарас не загуби ниту еден сет на претходните две пресметки со Саша во текот на годината, но денеска наиде на расположен ривал, но правеше и доста некарактеристични грешки како на претходните два меча.

Шпанецот со доста среќа го доби првиот сет во тајбрејкот и поведе со 1:0, но Зверев беше далеку поконстантен на свој сервис и на крајот тоа ја направи клучната разлика.

Германецот лесно израмни на 1:1 добивајќи го вториот сет со 6:3, додека подобар беше и во третиот одлучувачки, во кој доволен му беше еден брејк за триумф од 6:4.

Во истата група, подоцна вечерва силите ќе ги одмерат Данил Медведев и Андреј Рубљов во големото руско дерби.

The 2-time Champ is up and running 🏃‍♂️@AlexZverev defeats Alcaraz to kick off his #NittoATPFinals campaign! pic.twitter.com/Ds6sTahyoB

— Tennis TV (@TennisTV) November 13, 2023