Челси го освои „Сан Сиро“, ПСЖ повторно не ја доби Бенфика, Реал се спаси во Варшава

Фудбалерите на Челси славеа над Милан со 2-0 во дербито на вечерта во Лигата на шампионите.

Англискиот претставник по вторпат беше подобар од италијанскиот првак овојпат на „Сан Сиро“ со погодоците на Жоржињо од пенал и Обамејанг, голови кои дојдоа откако „росонерите“ останаа со играч помалку по исклучувањето на дефанзивецот Томори.

Во истата оваа група Динамо Загреб и Салцбург одиграа без победник 1-1. Репрезентативците Стефан Ристовски и Аријан Адеми беа стартери, но беа заменети во второто полувреме.

Челси со 7 бода е прв, потоа следи Салцбург со 6, па Милан и Динамо со по 4 поени.

Пари Сен Жермен одново не ја совлада Бенфика или поточно овојпат на „Паркот на принцовите“ одигра со истиот резултат како во Лисабон 1-1. Двата гола паднаа од пенал, Мбапе беше прецизен за домаќините, Жоао Марио за гостите.

Борусија Дортмунд и Севилја ремизираа (1-1), Лајпциг беше подобра од Селтик со 2-0, додека Реал во последен момент избегна пораз во мечот со Шахтјор Доњецк. Дефанзивецот Ридигер погоди во 95 минута за конечени 1-1 во Варшава.