Тиквеш го положи оружјето во Австрија и ја заврши европската авантура

Тиквеш направи голем подвиг во „Јасми“ и успеа да го победи Кремс со 33:29 на првиот меч, но денеска доживеаја пораз на гостувањето во Австрија и остана без пласман во ЕХФ Купот.

Македонскиот претставник со позитива од четири гола отпатува на гостувањето и тоа беше доста допар капитал на хартија, но лошиот старт на кавадарчани ги натера да бркаат резултат во текот на целиот меч.

Кремс отвори со 6:1 и ја анулираше негативата од Кавадарци, па притисокот се префрли врз македонскиот тим кој иако се обидуваше да се врати, сепак на крајот мина неуспешно во Австрија.

Резултатот на полувреме беше 17:13, но Кремс почна да се одлепува во вториот дел и одржуваше предност која им одеше во прилог, па на крајот оствари победа од осум гола разлика.

Со поразот од 33:25 тимот од Кавадарци ја заврши својата европска авантура, но ова дефинитивно ќе биде извонредно искуство за нив со оглед на квалитетот со кој се соочија.