Грилиш за ремито на Англија во Скопје: Доминиравме на тежок терен

Џек Грилиш беше дел од првите единаесет во англиската репрезентација на вчерашното гостување во Македонија, а голот кој го постигна од најдобрата шанса, му беше поништен со ВАР проверка поради очигледен офсајд.

Ѕвездата на Манчестер Сити по натпреварот ги коментирал случувањата во Скопје, истакнувајќи дека на нерешениот резултат не треба да се гледа како на посебен неуспех.

– Мислам дека не треба да бидеме престроги кон себе, ова се тешки натпревари за добивање.

– Тие постигнаа гол од пенал за кој мислам дека не постоеше, имаа уште неколку удари. Но, ние исто така можевме да добиеме пенал, ја погодивме рамката и мојот гол беше поништен.

– Мислам дека доминиравме на тежок терен за играње и во непријателска атмосфера, ова е тешко место за гостување, – изјавил Грилиш, а пренесува „Би-Би-Си“.