Клатенбург ја шокираше јавноста: Досудив пенал за Торес во финалето против Реал како компензација! (Видео)

Марк Клатенбург пред пет години беше убедливо најдобар судија во Премиер лигата и воопшто во светот, а негов хајлајт дефинитивно беше 2016-та година кога во период од 40-тина дена, ја делеше правдата на најголемите финалиња во Европа.

Англискиот арбитар беше судија на најважните натпревари во Лигата на шампионите и Европското првенство, но кога е во прашање она првото во најелитното клупско натпреварување, Клатенбург сега одново се исповеда и воедно ја шокираше јавноста со својата искреност.

Арбитарот веќе во неколку наврати самиот призна дека голот на Серхио Рамос во финалето меѓу Реал и Атлетико бил постигнат од офсајд, но сега призна дека всушност и компензирал на стартот на вториот дел кога досуди пенал за „душекџиите“ по дуелот меѓу Пепе и Фернандо Торес.

– Во таа ситуација, Торес беше поблиску до топката од Пепе и имаше мал прекршок. Го досудив тој пенал како компензација, да ја вратам рамнотежата во мечот. Реал Мадрид ја доби својата шанса со тој гол од офсајд, а сега беше ред на Атлетико.

– После тоа, Гризман шутна и не погоди, а јас си го помислив следното: Уау, ова е перфектен ден за еден судија. Атлетико ја имаше шансата за израмнување по голот од офсајд и не ја искористија. До ден денеска ќе ме обвинуваа мене, но сега не можат бидејќи Гризман имаше своја шанса со пеналот, – потенцира Клатенбург во последното обраќање.

Инаку, во споменатото финале, Атлетико успеа да израмни подоцна во вториот дел со голот на Караско, но потоа загуби во пенал рулетот од градскиот ривал.