Пелистер со пораз ја отвори новата сезона во Европската лига

Ракометарите на Еурофарм Пелистер доживеаа пораз од Архус од 30-27 во првиот меч во новата сезона во Европската лига на ЕХФ.

Македонскиот вицешампион имаше добри и лоши моменти на овој меч, па токму тиe осцилации во играта го чинеа пораз во салата „Боро Чурлевски“ во Битола. Гостите од Данска го добија првиот дел со 16-12, па токму таа предност ја одржуваа во второто полувреме иако домаќините се обидуваа, се закануваа, ама скандинавците секогаш имаа одговор и на крајот сосема заслужено го освоија целиот плен на овој премиерен натпревар.

По пет гола во дадоа Хосни и Хенеберг, а крилата Кузманоски и Костески беа автори на по четири погодоци. Во гостинскиот тим предводник со 11 гола беше Вест Ав Тејгум.

Во следното коло Пелистер гостува кај Агуаш Санташ во Португалија.