Тимот на Македонецот ја поправи штетата, Иџе имаше добар настап на втората трка во Мисано

Тимот на Игор Стефановски го оспособи автомобилот за втората трка на Мисано по несреќниот инцидент во текот на вчерашниот ден, а напорната работа на крајот се исплатеше со оглед на тоа што популарниот Иџе имаше задоволувачки настап.

Македонскиот возач конечно беше поштеден од ривалите и не беше удрен или истуркан од патеката, па така денешната втора трка на Мисано ја заврши на осмата позиција.

Краткото време за поправка на автомобилот по вчерашниот несовесен удар од еден од ривалите не му остави простор на Стефановски да се бори и за повисок пласман, но дефинитивно позитивна вест е што ја заврши втората трка на познатата патека.

Инаку, победник на втората трка во Мисано во рамките на првенството ТЦР Италија беше Анти Бури, кој заврши девет секунди подобро од нашиот претставник во италијанското автомобилистичко натпреварување.

Покрај Финецот, на пиедесталот ова попладне се искачија уште Никола Балдан од Италија и Џек Јанг од Британија.