Нестварни сцени на автодромот „Аиртон Сена“: Бразилецот Верисимо си обезбеди статус „трагичар на годината“ (Видео)

Изминатиов викенд на програмата беше трката од Супербајк шампионатот во Бразил, а од истата ни пристигнаа навистина неверојатни сцени кои се навистина ретка слика од познатите мотоциклистички натпреварувања.

Бразилецот Андре Верисимо е прогласен за трагичар на сезоната во Супербајк шампионатот во оваа јужно американска земја, бидејќи на последната трка која се возеше викендот, испушти победа поради прерано славје на автодромот во Гојаш кој го носи името на легендариот Аиртон Сена.

Верисимо имаше голема предност пред двајцата конкуренти, но одлучи да ја тргне раката од рачката за гас и почна да слави стоејќи на мотоциклот, но се покажа дека финишот е предалеку за него во ситуација кога Освалдо Филјо и Марсело Скаф со полна гас прелетеа на стартот на целната рамнина.

Андре изрежира таканаречена „стенд-ап“ комедија која за него се претвори во трагедија, па експресно наиде на огромен сеир на социјалните мрежи откако загуби „добиена трка“ и мораше да се задоволи само со третото место на пиедесталот.