Пелистер ја прекина негативната серија со триумф над МЗТ

Кошаркарите на Пелистер победија во дербито против МЗТ Скопје (81:71) и стигнаа до првата победа во новата сезона од Првата македонска кошаркарска лига.

Битолчани уште на полувреме имаа девет поени предност и најавија дека одат на победа против шампионот, а таа предност ја задржаа и по крајот на третиот период.

МЗТ успеа да стигне до минус пет при резултат 63:58 во 33. минута, но Пелистер одговори со серија 7:0 и го откажа противникот од опцијата да брка некаков пресврт во завршните минути.

Бернард и Маслинко постигнаа по 21 поен во победничката екипа, додека во редовите на МЗТ се истакнаа Расел со 18 и Танасковиќ со 17 поени.

По три рунди во шампионатот, МЗТ го доживеа првиот пораз, додека Пелистер има една победа и два пораза.