Емил Ристески освои втора норма за Интернационален мајстор

– Имав намера да играм за норма, но не си го поставив тоа како нужна цел, не сакав да играм под притисок. Ова беше наастап на Европско првенство, силен турнир со силни играчи, едноставно сакав да видам до каде сум. Резултатот е реален, на два пати можев да добијам партија, но само ремизирав, а исто така и два пати можев да загубам, но „се спасував“ со реми. Ова покажува дека се уште ја немам силата за велемајстор и дека е потребно уште работа,- изјави Ристески за „Дерби“, кој до овие успеси во кариерата стигна откако го ангажираше велемајсторот Трајко Недев за свој тренер.

На ова првенство триумфираа Матијас Блубаум од Германија и Габриел Саркисјан од Ерменија, освојувајќи по 8,5 поени, но според „тај-брејк“ критериумот златото му припадна на германскиот шахист кој имал противници со повисок просечен рејтинг. Третопласиран е Хрватот Иван Шариќ, кој е предводник на поголема група шахисти со по 8 бода.

Емил Ристески имаше стартен ранг како 177 играч според актуелниот рејтинг, а заврши на 153 место, а групата шахисти со 5,5 бода е протегната од 142 до 177 место. Покрај него, на турнирот настапија уште ВМ Кирил Георгиев, Филип Михов, ФМ Роберт Велески, Антон Златков и Мифтар Хедони.