Ивановски го надигра Овчаренко и ќе се бори за најголемата титула во кариерата

Најталентираниот македонски тенисер, Калин Ивановски обезбеди финале и во поединечна конкуренција на ИТФ фјучерсот што се игра во Куршумлиска Бања (Србија).

Ивановски во денешното пофинале го надигра Олександр Овчаренко, играчот кој е негов дубл партнер на овој турнир, човек со кого успеаа да дојдат во мечот за пехарот во игра на двојки.

Калин славеше со 2-0 во сетови со 7-5 и 6-2 по 1 час и 41 минута игра на теренот број три во Куршумлиска Бања. Со ова нашиот рекет се избори за шанса да дојде до најголемиот пехар во кариерата, а до тоа го дели само победа од подобриот меѓу Клемен Табур (Франција) и Самуел Винсент Руџери (Италија)

Досега Ивановски има три пехари на фјучерсите М15 и тоа на тврда подлога. Овој во Србија е турнир од М25 и тоа на земјена подлога.