Италијанските медиуми посебно издвоија една ѕвезда: Предизвика хаос во тимот на Македонија

Федерико Киеза пропушти неколку репрезентативни собири поради повреди и неговото отсуство е огромен минус за италијанската фудбалска репрезентација, која вчера го виде најдоброто светло на фудбалерот на Јувентус.

Киеза беше нерешлива енигма за македонските фудбалери и во улога на крило создаде многу проблеми за нашите фудбалери, со што се исполнија претпоставките на Лучијано Спалети пред натпреварот.

Италијанскиот селектор посочи дека Киеза е светска класа и го спореди со младата тениска ѕвезда, Јаник Синер, па откако беше избран за најдобар играч во Рим, со големи пофалби се јавија и највпечатливите италијанските медиуми.

Во прв план се најдоа коментарите на „Газета дело Спорт“ и „Кориере дело Спорт“, медиуми кои ставија акцент на зборовите на Спалети, но и на изданието кое го имаше Киеза против Македонците.

– Киеза се врати на крилото и предизвика хаос во одбраната на Македонија. Тој има луда желба, влегува максимално на секоја топка, постигнува голови од далеичина, шутира отсекаде. Да, тој е како Синер, или како играчот кој блескаше на „Вембли“, – пишува „Газета“.

– Киеза е безмилосен како Синер. Тој мисли само на победа и презема ризик бидејќи не размислува да сопре на теренот. Пред натпреварот, Спалети го спореди со тениската ѕвезда Синер. Тоа беше значајна споредба, а Федерико одговори со два гола за да го однесе мечот во посакуван правец, – пишува „Кориере“.