Хоселу: Им се извинувам на сопругата и моите деца, но овој ден е……

Хосе Луис Мато Санмартин го дочека својот ден од соништата, бидејќи денеска беше претставен за нов член од првиот тим на клубот на неговиот живот.

Шпанскиот репрезентативец надалеку е многу попознат како Хоселу и со ова име на грбот се прослави во шпанската Ла Лига, но сега го дочека најубавиот момент во играчката кариера и се врати во клубот во кој почна како младинец.

Хоселу е продукт на младинската школа на Реал и својот пат во елитата мораше да го бара во други клубови, но сега судбината го врати на „Сантијаго Бернабеу“ и призна дека денеска доживеал еден од најубавите денови во животот, а не само во кариерата.

– Им се извинувам на мојата сопруга и моите деца, но ова е еден од најсреќните денови во мојот живот. Сонував да се вратам во Реал и денеска е денот кога се враќам.

– Не дојдов за да заменам никого, сакам само да го испишам моето име во Реал. Дојдов да уживам, Карим беше еден од најдобрите, јас дојдов да завршам друга работа. Реал е клубот на мојот живот, ќе го дадам максимумот за овој дрес. Постигнував голови во цела моја кариера и верувам дека тоа ќе продолжи и во Реал, – изјави Хоселу.