Горецка го вжештува големото дерби на „Камп Ноу“ со провокација до Левандовски

Баерн Минхен си ја заврши својата работа во првите четири рунди и си обезбеди пласман во осминафиналето во Лигата на шампионите, па сега последните два меча ќе ги игра само за чест и престиж.

Баварскиот великан без никаков резултатски императив ќе патува во Барселона и ќе го одигра дербито на „Камп Ноу“, кое сепак Леон Горецка реши да го вжешти со провокацијата која ја испрати до својот поранешен соиграч Роберт Левандовски.

Барса не зависи од себе и мора да се надева дека Интер ќе киксне со Викторија Плзен, бидејќи ако не се случи тоа, каталонскиот великан ќе остане без шанси за пласман во нокаут рундата.

– Левандовски беше доста размазен во Баерн Минхен, бидејќи знаеше дека без оглед на се, секогаш во најмала рака ќе стигне до осминафиналето во Лигата на шампионите, а веројатно и подалеку. Судејќи според неговата актуелна ситуација, тоа не е баш така.

– Ние немаме што да загубиме, но кога играте натпревар на „Камп Ноу“, сакате да победите по секоја цена. Без оглед дали е обичен пријателски натпревар, или финале во Лига на шампиони. Нема да калкулираме, ќе направиме се за да победиме, – изјави Горецка.