Ѓоковиќ се намачи против голем аутсајдер, но ја мина првата пречка во Монте Карло

Новак Ѓоковиќ беше на принудна пауза поради тоа што не доби дозвола да игра на двата турнир на американско тло, па како што беше најавено, неговото враќање на терените е она во Монте Карло.

Светскиот рекет број еден ќе го брани тронот на турнирот кој важи за негов домашен поради тоа што живее во Монако, иако мораше да се изнамачи на првиот тест кој на хартија не требаше да биде толку тежок.

Русинот Иван Гаков требаше да биде лесен испит за најдобриот светски тенисер, но наместо тоа, се покажа како многу цврст орев, особено во првиот сет кој беше доста возбудлив и израмнет.

198-от тенисер на АТП листата прв направи брејк и успеа да поведе со 4:3 во воведниот сет, но Ноле експресно возврати, а потоа видовме завршница во тајбрејк.

После 69 минути игра, Новак го освои првиот сет и поведе со 1:0, а потоа беше доста поубедлив и почна полесно да ја чита играта на големиот аутсајдер. Ѓоковиќ во вториот сет направи два брејка и на крајот славеше со 6:2 за пласман во третата рунда, каде ривал ќе му биде Нарди или Музети.