Балотели му зададе низок удар на Манчини во обидот да ја објасни големината на Мурињо

Марио Балотели се врати во Адана Демирспор и ќе има нова етапа во овој клуб, а пред вториот предизвик кој ќе го има во Турција, „Супер Марио“ се наврати на искуствата кои ги имаше со Жозе Мурињо.

Контроверзниот напаѓач во неколку наврати имаше „топло-ладен“ однос со Португалецот поради глупостите кои ги правеше на теренот и надвор од него, но сепак кога е во прашање генералниот заклучок, Балотели има само добро мислење за „специјалниот“.

Во својот обид да ја истакне големината на Португалецот, Балотели не пропушти да испрати и една „отровна стрела“ до Роберто Манчини, со кого најпрво имаше извонреден однос, но во последно време се наруши после неколку зајадливи изјави од новиот селектор на Саудиска Арабија.

– Мурињо никогаш не бил тренер кој ќе наметне убава игра во еден тим. Тој е харизматичен тренер, ви дава храброст и ви дели комплименти. Тој има јасни идеи за играта, но не се оптеретува премногу со тактика. Мурињо има специјален карактер, навистина е специјален.

– Имавме и вербални дуели, ме тераше да се смеам многу, но знаеше како да ме мотивира. Тој го вади најдоброто и најлошото од вас. Кога бев дел од Интер, играв со 25 феномени. Го гледаме каков е и сега. Дојде во Рома и ја освои Конференциската лига. Тој е тренер кој секогаш победува и тоа го има внатре во себе. Не може само да го напаѓате Мурињо, бидејќи тој е тренер кој носи победи. И Манчини го имаше најдобриот тим, но не победуваше секогаш како Мурињо, – изјави Балотели.