Каратистите на Макпетрол освоија седум медали на „Кроација Опен“

Карате клубот Макпетрол изминатиов викенд учествуваше на силниот меѓународен турнир „Кроација Опен“ во Ријека, на кој во конкуренција биле 1703 каратисти од 21 земја.

Успешниот настап на осумте претставници на Макпетрол е комплетиран со седум медали, од кои пет сребрени и два бронзени, што е добра најава во пресрет на Светското првенство кое ќе се одржи во Обединетите Арапски Емирати.

Сребрени медали освоиле Петар Спасеновски (сениори опен категорија), Роберт Ацковски (категорија до 67 кг), Ангела Мојсовска (категорија до 68 кг) и Стефан Стојановиќ (две сребра), додека бронзени одличија освоиле Петар Заборски (сениори опен категорија) и Глигор Петков (до 84 килограми).

Тренерот Бошко Заборски го оцени учеството на Макпетрол на силниот турнир како успешно.

– Овој турнир е сигурно најмасовен и најквалитетен интернационален турнир. Тоа што се одржува непосредно пред почетокот на светското сениорско првенство кое треба да се одржи во Дубаи, затоа повеќе држави дојдоа со своите сениори и направија извонредна контрола на моменталната форма, тоа го направивме и ние. Како клуб со нашите репрезентативци освоивме вкупно седум медали и поради тоа сме многу задоволни, имавме дури пет финалиња со по четири последователно добиени борби од страна на нашите спортисти.

– Сениорските репрезентативци Петар Заборски, Петар Спасеновски и Ангела Мојсовска покажаа добра форма и голема борбеност. Сакам да истакнам и тоа дека нашиот актуелен европски јуниорски првак, на овој турнир направи вкупно 10 борби. Учествуваше во две финалиња и кај јуниорите, но ние го при(јавивме и во (У21) постари јуниори бидејќи тој во месец февруари полни 18 години. Стефан Стојановиќ го потврди својот голем квалитет и освои две сребрени медали на овој силен турнир, вели Заборски.