Атаман збесна поради една судиска одлука, Јанакопулос повторно ја „поздрави“ Евролигата (Видео)

Панатинаикос вчера загуби на домашен терен од Макаби во драматичен натпревар од кошаркарската Евролига, а домаќините не го кријат незадоволството од работата на судиската тројка на дуелот во Атина.

Тренерот Ергин Атаман рано доби втора техничка грешка и исклучување, а причина беше неговата жестока реакција кон судијата Роберт Лотермозер, откако тој и неговиот колега решија дека еден прекршок на гостите нема да биде преквалификуван како неспортски.

Ergin Ataman’s ejection from up close 🧐pic.twitter.com/YrPr8tkbaG

— BasketNews (@BasketNews_com) October 20, 2023

Турскиот стручњак ги загуби нервите и беше испратен во соблекувална, а по поразот на ПАО реагираше и контроверзниот сопственик Димитрис Јанакопулос. Тој и досега често добиваше казни поради критиките на адреса на Евролигата, но тоа не го спречи да испрати порака преку социјалните мрежи.

– Не ги почитувате нашите шест титули, нашиот бренд, не ја почитувате нашата фамилија која 30 години вложува во кошарката, не го почитувате најдобриот тренер во Европа. И на крајот на краиштата, не ги почитувате нашите навивачи, на која основа сметате дека ние треба да ве почитуваме вас? – напишал Јанакопулос.