Стефановски го заокружи викендот на Имола со шесто место на втората трка

Македонскиот автомобилист Игор Стефановски извозе уште една солидна трка од ТЦР Италија на патеката Имола и сериозно ја подобри позицијата во однос на стартот.

Иџе и денеска стартуваше како шеснаесетти, што дефинитивно значи комплицирана трка, но на крајот стигна до одличното шесто место.

Стефановски зад себе остави седумнаесет возачи со пласман и уште четворица кои не обезбедија пласман, па може да биде задоволен од ТЦР Италија викендот на Имола.

Вчера, Иџе стартуваше од истата позиција, а го освои осмото место, откако и самиот потврди дека во завршницата останал без ауспухот, што ги намалило перформансите и создавало голема бучава во кабината.

Победник на денешната трка е Италијанецот Кевин Чекон, а на победничкиот пиедестал се најдоа и Матијас Вахтел и Душан Курил.