Мајами направи брејк во „Ти-Ди Гарден“, Оклахома пресилна за Њу Орлеанс (Видео)

Бостон и Мајами имаа убава историја минатата сезона и играа мајсторка откако Селтикси се вратија од негатива од 3:0, но на крајот сепак не станаа првиот тим кој направил целосен кам-бек.

Мајами со победа во „Ти-Ди Гарден“ славеше во финалето на Истокот, а сега овие два тима ги одмеруваат силите во првото плејоф коло и „жешките“ повторно покажаа дека се незгоден ривал.

Иако Бостон беше недопирлив во регуларниот дел, повторно му дозволи на Мајами да направи брејк и да се врати во игра, па сега резултатот е 1:1 пред серијата да се пресели на Флорида.

Резултатот рано утрово беше 101:111, а до израз дојде тимската игра на Мајами во која Хироу предводеше со 24 поени, следен од Адебајо и Мартин кои уфрлија по 21 поен.

На вториот меч кој се играше во НБА лигата, Оклахома покажа дека е класа за себе во дуелите со Њу Орлеанс, па сега води 2:0 во серијата. Тандерси славеа со 124:92, а главна ѕвезда на теренот секако беше Гилџес Александер со 33 поени.