Рома ја наполни мрежата на Торино за крај на сезоната во Серија А

Рома го победи Торино со убедливи 3:0 и на најдобар можен начин стави крај на своите настапи сезонава во Серија А.

Избраниците на Жозе Мурињо беа расположени на теренот во пресрет на финалето на Конференциската лига и го надиграа незгодниот противник како гости.

Ејбрахам го отвори резултатот во 32. минута, за неколку минути подоцна да изнуди пенал, кој самиот го реализираше за 0:2 на полувреме.

Капитенот Пелегрини од пенал ги постави конечните 0:3 во вториот дел, а со победата Рома си гарантираше место во Лига Европа, односно може да биде најмалку на шестата позиција на табелата.

Мурињо искористи најголем дел од своите првотимци вечерва, а следна цел на „волчицата“ е триумф во Конференциската лига, во чие финале противник на италијанскиот тим ќе му биде Феенорд.