Работнички го допре дното: Постигна двојно помалку поени од противникот и загуби со 51 разлика

Работнички со многу административни проблеми и со скратен ростер ја отвори новата 2022-ра година, но тоа го направи на начин кој дефинитивно не му доликува на клубот.

Најтрофејниот кошаркарски колектив во нашата земја се соочува со огромна криза и денеска едвај состави тим за да му се спротивстави на Феникс 2010, но без странците и важните играчи тоа изгледаше навистина трагично за Работнички кој претрпе еден од најсрамните порази во својата историја.

Младите играчи на Работнички парираа само во почетниот дел од мечот, а потоа почна да се активира тонењето кое не прекина до самиот крај на средбата.

Играчите на Феникс не покажаа милост кон разнишаниот противник кој се наоѓа во голема криза на стартот на годината, па на крајот постигнаа двојно повеќе поени од Работнички и победија со нестварни 102:51.

Разликата од точно 51 поен остава ужасна слика за кошаркарската гордост од Центар и ова е доказ дека е допрено дното, по што останува да видиме како ќе се развиваат наредните неколку дена и во која насока ќе продолжи да функционира клубот.