Олмо со емотивна порака го испрати Адеми во Кина (Фото)

Македонскиот репрезентативец Аријан Адеми стави крај на својата долгогодишна авантура во Динамо Загреб, каде сигурно се стекна со статус на легенда, и кариерата ќе ја продолжи во Кина.

Во текот на вчерашниот ден Адеми против Ријека го одигра својот последен натпревар за „модрите“ по неговиот трансфер во тимот на Пекинг Гуан и јасно беше дека сите очи во хрватската и пошироката фудбалска јавност ќе бидат вперени кон него.

Така, за време на натпреварот против Ријека, со емотивен коментар на социјалните мрежи се јави некогашниот соиграч на Адеми, а сега играч на Лајпциг и редовен шпански репрезентативец, Дани Олмо.

Олмо на својот Инстаграм профил му се заблагодари на неговиот некогашен капитен со кого постигнаа многу успеси во дресот на Динамо Загреб.

– Еден е Аки. Ти благодарам за се капитену, -напиша Олмо објавувајќи фотографија на која се гледа како го следи последниот натпревар на нашиот репрезентативец во дресот на хрватскиот гигант.