Мир стигна до прва победа во сезоната и дојде на чекор од титулата во Мото ГП

Жоан Мир беше лидер во генералниот пласман и покрај тоа што немаше остварено ниту една Мото ГП победа оваа сезона, но сега на две трки пред крајот, конечно стигна и до највисокото скалило на пиедесталот и стигна чекор поблиску до најголемиот успех во кариерата.

Шпанскиот возач на Сузуки ова попладне беше најбрз на трката за Големата награда на Европа која се вози во Валенсија, добивајќи го дуелот со својот сонародник и тимски колега Алекс Ринс, но што е уште поважно, ги остави далеку зад себе главниоте ривали за титулата.

Возачите на Јамаха имаа ужасен ден и со тоа го оставија Мир во пол позиција за осовјување на титулата, бидејќи Вињалес заврши 13-ти, Квартарато 14-ти, а нешто подобар беше Морбидели кои заврши 11-ти.

Повратникот Валентино Роси поради проблеми со моторот не ја доврши трката, по која Мир сега има се во свои раце да се радува на трофејот уште на следната трка.

Возачот на Сузуки сега има дури 37 бодови предност во однос на второпласираните Квартараро и Ринс на две трките пред крајот, со тоа што следниов викенд одново се вози на патеката во Валенсија.