Македонија загуби од Србија и остана без бронза на Медитеранските игри

Македонската ракометна репрезентација на крајот се враќа без освоен медал од Оран, бидејќи денеска загуби во „малото финале“ и не стигна до бронзата.

Во регионалното балканско дерби против Србија, нашиот северен сосед на крајот беше поуспешен и славеше победа од 34:29, триумф со кој се пласираше на третото место на Медитеранските игри.

Враќањето без бронзата е вистинска штета ако се земе во предвид како старт на мечот имавме денеска, бидејќи во првата третина од натпреварот често водевме со плус три и изгледавме како поквалитетна селекција.

Сепак, падот на крајот на првото полувреме продолжи со лоша игра и во вториот дел, а осцилациите во играта резултираа со конечен пораз и победа на поискусните српски ракометари.

Селекторот Кирил Лазаров го искористи овој турнир за да им даде шанса на многу млади ракометари, па сега ќе има подобра слика за нив и ќе одлучи дали заслужуваат шанса во најсилната селекција.