Капитенот Гундоган даде искрена оценка за финалето: Овојпат среќата беше на наша страна

Манчестер Сити конечно дочека да го мине последното скалило во Лигата на шампионите и стана европски шампион, откако вечерва во едно израмнето и цврсто финале успеа да го победи Интер со 1:0.

„Граѓаните“ важеа за големи фаворити и многумин најавуваа и нивна убедлива победа, но реалноста на теренот беше друга и Интер во најмала рака може да жали што не се избори за продолженија.

Утката на Ромелу Лукаку направи голот на Родри да биде еден и единствен на финалето во Истанбул, а за разлика од некои други натпревари, вечерва и среќата беше на страната на тимот на Пеп Гвардиола.

– Ова е неверојатно чувство, тешко е да се преточи во зборови. Вечерва испишавме историја за овој клуб. Мора да бидеме искрени, ова беше тежок натпревар за двата тима, а ние не бевме доволно добри во првиот дел. Многу се двоумевме, имавме дилеми и знаевме дека мораме многу подобро во првиот дел.

– Ова беше 50-50 натпревар, овојпат среќата беше на наша страна. Сите зборуваа за триплетата пред натпреварот, но тоа не ни донесе притисок. Овој тим знае да се носи со притисокот на најдобар можен начин, – изјавил Гундоган за „Би-Ти Спорт“.