Димитријевиќ: Ќе го дадам максимумот за да им помогнам на соиграчите во Скопје, да го одбраниме домашниот терен

Ненад Димитријевиќ е еден од тројцата важни репрезентативци кои нема да можат да и помогнат на репрезентацијата во Тбилиси, но затоа членот на Валенсија се надева дека ќе ги искористи претстојните неколку дена за да се подготви за вториот меч кој се игра во нашата земја.

Димитријевиќ е веќе во Скопје и со мислите насочен кон вториот натпревар кој го играме против Грузија во македонската престолнина, пресметка која е закажана за 27 февруари во „Борис Трајковски“.

Популарниот Нено има доста проблеми со повреди од стартот на сезоната, но вети дека ќе се обиде да ја санира последната за да им помогне на репрезентативците на домашен терен против Грузијците.

– Сезонава имам повеќе проблеми со повредите и затоа одиграв помал број натпревари и за Валенсија. Но, кога веќе дојдов тука ќе го дадам максимумот за да бидам подготвен за вториот натпревар со Грузија. Овие два натпревари се многу важни за нас, особено тој во Скопје.

– Треба да го одбраниме домашниот терен и да продолжиме да работиме за следните натпревари со Украина. Во професионалната кошарка нема млади и стари играчи, има само добри и лоши. Не чувствувам никаков притисок кога го носам националниот дрес, среќен сум што ме сметаат за лидер на оваа генерација, – потенцира Димитријевиќ.