Де Брујне е избран за нов капитен на Белгија: Ова е голема чест за мене

Селекцијата на Белгија го започнува квалификацискиот циклус за Европското првенство и тоа со нов селектор во името на Доменико Тедеско, но и без Еден Азар кој долго време беше најдобар играч на „црвените ѓаволи“.

Азар реши да замине во репрезентативна пензија по Мундијалот во Катар, а тоа воедно значеше дека оваа репрезентација ќе добие нов капитен. Немаше изненадување и за нов лидер на екипата беше избран асот на Манчестер Сити, Кевин Де Брујне.

-За мене е чест да бидам именуван и да ја претставувам земјата на овој начин. Имам скоро 32 години. Никогаш не сум размислувал за пензионирање од репрезентацијата. Мислам дека сè уште можам да донесам нешто на маса и да им помогнам на младите, -порача Кевин кој за Белгија има одиграно 97 натпревари и дадено 25 погодоци.