Алегри потврди дека првотимец на Јуве е пред преселба во Премиер лигата: Се е договорено за трансфер

Масимилијано Алегри мораше да претрпи сериозни турбуленции во изминатиот период и да се насочи само кон случувањата на теренот, но по комплетната промена на Управниот одбор и добиената казна од 15 бода, сега ќе остане покус и за еден играч во ростерот.

Иднината на Вестон МекКени веќе не е поврзана со Јувентус, откако играчот за врска ги договорил сите детали за трансфер во Премиер лигата, или поточно во екипата на Лидс Јунајтед.

Англискиот клуб со последната понуда ги задоволил барањата на италијанскиот великан, кој најпрво ќе го испрати МекКени на позајмица до крајот на сезоната за сума од 1,5 милион евра, а потоа ќе чека отштета за перманентен трансфер од 35 милиони евра.

– Не сметам на МекКени за утрешниот меч со Монца, не можам да сметам на него кога има трансфер шпекулации со него. Всушност, мислам дека двата клуба веќе постигнаа договор за трансфер. Ќе биде безначајно да го имам во тимот на утрешниот меч.

– Има постигнат договор меѓу двата клуба, но не знам кога точно ќе биде комплетиран. Тој беше на трансфер пазарот и нормално е да не биде дел од тимот, – изјави Алегри.