Уште едно ново име во таборот на „романтичарите“: Момчило Рашо потпиша за Работнички

Екипата на Работнички продолжува со активностите во овој зимски преоден рок, а најновата вест е дека е потпишан договор со црногорскиот интернационалец Момчило Рашо.

Рашо има 24 години и во таборот на клубот од Дебар Маало доаѓа од српскиот прволигаш Раднички Крагуевац. Ова за Момчило ќе биде втора епизода во Работнички со оглед на тоа што веќе беше дел од овој состав во периодот од 2016 до 2018 година.

–Драго ми е што се враќам во Работнички, многу добро знам каков рејтинг има Работнички во Македонија и на меѓународна сцена. Се надевам дека ќе дадам полн придонес за успешна пролет на тимот, изјави Рашо за клупската страница.

Претходно овој македонски прволигаш ги ангажираше Арменд Алими, Анес Рушевиќ, Арбин Зејнулаи и Димитриј Попоски.