Пелистер поднесе жалба до ЕХФ за судењето на мечот со ПИК Сегед

Македонскиот ракоменет прволигаш, Еурофарм Пелистер испрати официјална жалба до ЕХФ за судењето на мечот против ПИК Сегед во Лигата на шампионите.

Клубот од Битола не е задоволен од арбитражата на судиите Карим и Рауф Гасми и го искористи правото да и се обрати на Европската ракометна федерација.

-РК Еурофарм Пелистер во склоп на својата транспарентна и отворена врска со своите приврзаници ја информира јавноста дека поднесе официјална жалба на арбитражата на француските судии Карим и Рауф Гасми на натпреварот од осмото коло од групата А на Лигата на шампионите против ПИК Сегед.

-Сметаме дека нашиот клуб не доби адекватен третман во текот на целиот натпревар, делењето на правдата не беше соодветно на степенот на натпреварувањето и одлуките на судиите директно влијаеја на конечниот резултат и финалниот исход. Клубот го искористи своето право да се обрати до Европската ракометна федерација (ЕХФ) и неговата судиска организација и да побара одговорност од делителите на правдата. Оваа жалба е одговорност кон нашите професионалци во клубот, армијата навивачи на Еурофарм Пелистер и македонскиот ракомет кој го претставуваме, -порачаа пелистерци.

Само за потсетување нашиот првак го загуби вчерашниот меч со 28:27 со гол во последните секунди.