На каталонците им истекува времето: Барселона има уште 24 часа за активирање на поволната клаузула за Караско

Чави Ернандес говореше за приоритетите во средниот ред на Барселона веднаш по самиот крај на сезоната во која Барселона стана шпански шампион, но отворено го посочи и Јаник Караско како играч кој има сериозни шанси да пристигне на „Камп Ноу“.

Причина за тоа е пактот кој го склучија Барселона и Атлетико Мадрид во минатиот зимски преоден рок, според кој Барса ќе има повластена цена за Белгиецот до крајот на месец јуни.

Со оглед на тоа што Барса не презема никакви акции досега, „Марка“ потсетува дека на каталонскиот гигант му истекнува времето и му преостануваат само уште 24 часа, бидејќи после тоа сумата ќе биде многу поинаква.

Откупната цена која важи само за Барселона изнесува 19 милиони евра, но како што стојат работите, клубот во овој момент очигледно ги нема потребните финансии за да го осигура потписот на Белгиецот.

Крилниот напаѓач има договор со Атлетико до летото 2024-та година, па ако не се реализира опцијата Барселона, или ќе потпише нов договор, или ќе биде продаден на друг клуб до крајот на овој преоден рок.