МЗТ покажа две лица во Бања Лука и излезе како победник во драмата против Хелиос

МЗТ Скопје покажа две лица на отворањето на турнирот кој се игра во „балон“ услови во Бања Лука, па на крајот избраниците на Кочов можат да бидат среќни што отворија со победа против Хелиос.

Тимот од Домжале допатува максимално десеткуван поради проблеми со коронавирусот и имаше недостаток на многу важни играчи, па иако македонскиот претставник на почетокот максимално сериозно си ја сфати работата и направи убедлива предност, во второто полувреме за малку ќе прокоцкаше се откако го покажа и своето лошо лице.

„Штрковите“ го надиграа противникот во првото полувреме во кое постигнаа по 23 поени во секоја од четвртините, но 46-те поени од првиот дел беа заменеи со разочарувачки 24 во второто, што за малку ќе резултираше со шокантен резултат и пресврт во коирист на словенечкиот тим.

МЗТ стигна до максимални плус 12 разлика предност при крајот на третата четвртина, но во последниот период, кошаркарите на Кочов комплетно се исклучија и малку фалеше да направат од „готово-вересија“.

Хелиос успеа да израмни во последната минута и се избори за 69:69, а за среќа на МЗТ, не го искористи и шутот за победа кој го имаше во последниот напад. Пред да се случи тоа, добра вест беше тоа што Мекиќ погоди едно од двете слободни фрлања, па МЗТ во агонија стигна до победа од 70:69.

Олуџоби со 16 поени беше најдобар кошаркар во редовите на МЗТ, Бојиќ уфрли 12, додека во противничкиот табор најдобар беше Махковиќ со 21 поен.