Маркињос: Сега Нејмар е на наша страна

Попладнево се извлекоа двојките за осминафиналето на Лигата на шампионите, а најинтересниот пат дефинитивно е Барселона-Пари Сен Жермен.

Ова се две екипи кои се при самиот врв на европскиот фудбал, постојано вложуваат и дефинитивно не очекува интересен двомеч на „Камп Ноу“ и „Паркот на Принцовите“.

-Одличен натпревар и голем предизвик. Барселона е една од најдобрите екипи во светот. Очекувам вистинска борба и подготвени сме за тоа. Ја гледавме ждрепката, нe останаа уште многу потенцијални ривали, бевме подготвени за она што се случи. Имаме многу мотиви да продолжиме понатаму, -истакна капитенот на ПСЖ, Маркињос кој смета дека фактот што сега кај нив е Нејмар може да им помогне да ја добијат Барселона од која загубија неколку важни битки во изминативе години.

-Голема е историјата на дуелите со Барселона.  Имаше убави, но уште повеќе тажни моменти. Сега созреавме како тим и сигурно имаме шанса. И важна работа. Нејмар беше во дресот на Барселона пред три години и со три гола практично не елиминираше самостојно. Тој сега е со нас и може да биде предност во наша полза, -порача Бразилецот.