Левандовски разочаран од изјавата на Салихамиџиќ за Халанд

Хасан Салихамиџиќ како спортски директор на Баерн Минхен призна дека германскиот великан будно ја следи ситуацијата со Ерлинг Халанд и го има во своите планови за иднина, изјава која сепак воопшто не му се допаднала на актуелниот вистински лидер во нападот на баварскиот великан.

Роберт Левандовски со години наназад е ударна игла и незаменлив во нападот на Баерн Минхен, а како што уверува угледниот „Билд“, полскиот напаѓач останал разочаран од изјавата на популарниот Брацо поврзана за норвешкиот голгетер кој сега настапува за Борусија Дортмунд.

Салихамиџиќ не штедеше комплименти за Халанд и го стави Ерлинг на највисоко скалило во европскиот фудбал, но поделените комплименти не го импресионирале Левандовски кој наводно е лут на спортскиот директор од кого ќе бара и објаснување.

Според верзијата на „Билд“, Левандовски ги оценил како непочитувачки коментарите на Брацо за Халанд кога тој и натаму руши рекорди како најдобар напаѓач во Бундеслигата, што може да биде и контрапродуктивно за баварците со оглед на тоа што во најскоро можно време, треба да почнат преговори меѓу водечките луѓе на клубот и претставниците на Полјакот.

Левандовски има важечки договор со Баерн до 2023-та година, па ако не се постигне посакуван договор до крајот на оваа сезона, „Билд“ прогнозира дека ќе постојат големи шанси Роберт да направи трансфер во летниот преоден рок.