Ѓоковиќ загуби сет, но ја мина првата пречка на Вимблдон

Новак Ѓоковиќ мораше да игра четири сета, но обезбеди место во второто коло на тенискиот грен-слем Вимблдон.

Србинот играше против 24-годишниот корејски тенисер Сонгву Квон и добро го започна мечот, освојувајќи го првиот сет со 6:3.

Сепак, Квон возврати со израмнување, освојувајќи го вториот сет со ист резултат, што беше причина и за брзо консолидирање на големиот фаворит.

Ѓоковиќ мораше да чека дури до осмиот гејм за да направи брејк и да поведе со 2:1, а победникот го реши освојувајќи сервис на противникот во петтиот гејм од четвртиот сет.

Квон и во двата случаја не успеа да возврати,  а сигурно ќе извлече позитивни работи од фактот што го задржа Ѓоковиќ два и пол часа на теренот.

Во следната рунда противник на Ѓоковиќ ќе му биде подобриот од дуелот меѓу Кокинакис и Мајчржак.