Еурофарм Пелистер ќе бара нов тренер: Спогодбено раскината соработката со Бабиќ

Од таборот на Еурофарм Пелистер во текот на денешниот ден и официјално објавија дека спогодбено е раскината соработката со досегашниот тренер, Жељко Бабиќ.

Хрватскиот стратег две и пол сезони беше на чело на битолскиот тим со кој не успеа да дојде до поголем успех на домашно тло, односно не успеа да го симне Вардар од врвот  во националниот шампионат, а единствено успеа да го освои само националниот Суперкуп на почетокот на оваа сезона.

Од Пелистер изразија благодарност до Жељко Бабиќ за неговата придонес кон развојот на клубот во изминатиов период.

– РК Еурофарм Пелистер ја известува јавноста дека спогодбено со тренерот Жељко Бабиќ ја искористи опцијата во договорот за прекин на соработката на крајот на сезоната. По две и пол сезони нашиот клуб ќе добие нов тренер за сезоната 2022/23.

-Најискрено му се заблагодаруваме на Жељко Бабиќ за развојот на клубот во претходниот период од 2020 година до денес. Без негова помош нашиот проект немаше да се развива по предвидениот колосек. Исто така изразуваме благодарност за остварените цели во европските натпреварувања и освоениот Суперкуп на Македонија 2022.

-Клубот му посакува многу успех во понатамошната работа и вратите на нашиот клуб секогаш ќе бидат отворени за професионалци како него.