Баерн го потврди новиот спортски директор, ангажираше оперативец со врвно педигре

Баерн Минхен денеска потврди дека нов спортски директор на клубот од 1. септември ќе биде Кристоф Фројнд.

Германскиот великан одреден период беше во потрага по наследник на Хасан Салихамиџиќ, а успеа без многу шпекулации да го договори досегашниот прв фудбалски оперативец на РБ Салцбург.

За 46-годишниот Австриец ова ќе биде прво искуство во германската Бундеслига, но гаранција за неговиот квалитет се трансферите кои на Салцбург му овозможија да обезбеди сериозен профит, но и солидни натпреварувачки резултати.

Фројнд прв успеа да забележи играчи како Халанд, Адејеми, Собослаи, Мане, Упамекано и други, а по нивниот придонес во австриската екипа, истите заминаа носејќи му посакувана заработувачка на австрискиот прволигаш.

Изминатиот период, Фројнд имал понуда и од Челси, но решил да остане во РБ Салцбург, но очигледно не можел да ја одбие понудата на Баерн, кој од него ќе очекува да влече важни потези во однос на идните трансфери на клубот.

ℹ Dienstantritt am 1. September: FC Bayern holt Christoph Freund als Sportdirektor.

— FC Bayern München (@FCBayern) July 18, 2023