Арсенал ги договорил деталите за продолжување на соработката со еден од најважните играчи

Премиерлигашот Арсенал ќе ја започне и следната сезона со шампионски амбиции, а една од најважните задачи за менаџментот беше да го гарантираат останувањето на Вилијам Салиба.

Одличниот француски дефанзивец имаше клучна улога во позитивната резултатска серија која го одведе и задржа Арсенал долго на првото место на табелата, а случајно или не, „топчиите“ го загубија чекорот со Сити откако се повреди и не можеше да им помогне на соиграчите.

Сега случајот „Салиба“ е решен, 22-годишниот фудбалер прифатил да потпише нов договор, со кој ќе има обврски кон Арсенал до 2027 година.

Салиба за ова ќе си добие и многу подобри финансиски услови, но Арсенал ќе ги неутрализира обидите на ривалите да го привлечат дефанзивецот.

Се очекува клубот да ја соопшти информацијата наредните денови, што ќе биде и потврда за фановите дека Салиба останува уште долго на „Емирејтс“.