Ангеловски веднаш направи анализа: Натпреварот го загубивме заради две клучни работи

Составот на Еурофарм Пелистер не успеа да оствари позитивен резултат на соочувањето со Загреб во Лигата на шампионите, средба која ја загубија со еден гол разлика 23:22.

Актуелниот македонски првак се бореше низ сите 60 минути, но и овојпат му фалеше одредена нијанса, потег за да дојде до првиот бод/бодови во елитното натпреварување. Според тренерот Бранислав Ангеловски овој негативен резултат се должи на две работи, лошата реализација во првиот дел и бавното враќање во одбрана во второто полувреме.

-Им благодарам oд срце на сите навивачи што ни дадоа поддршка и што во оваа ладна битолска ноќ ги заменија своите домови со салата и не бодреа во живо. Жал ми е што не победивме, имавме неколку шанси. Работевме добро во претходните денови, натпреварот го загубивме со две клучни работи – прво полувреме реализацијата, а во второто тоа беше враќањето кое ни беше очајно, иако знаевме дека Дибиров на оваа страна ќе оди на брз центар и ќе напаѓа од десно.

-Тоа беа клучни работи да не можеме да напаѓаме за нерешено или за водство. На секој наш даден гол, примавме брзо гол, иако игравме само со една измена одбрана-напад. Тоа е единствената замерка која ја имав. Вториот тајм-аут го зедов за одбраната и враќањето, ама  пак примивме два гола. Со одбраната 5-1 добивме некоја агресивност, ама на крајот одлучија тие два гола. Му честитам на Загреб за одличната претстава и му посакувам многу среќа во понатамошниот тек на ЛШ, -истакна Ангеловски.

Следната средба за „фармацевтите“ во ЛШ е против ПСЖ на 14 февруари во Битола.