Ангеловски направи комплетна револуција во стартната постава за мечот со Ерменија (Фото)

Македонскиот селектор Игор Ангеловски направи комплетна револуција во стартната постава за мечот со Ерменија, нешто што можеше и да се очекува со оглед на проблемите кои настанаа со неколку повредени, но и суспендирани фудаблери.

Предводникот на нашиот тим нагласи дека има доверба во сите играчи кои отпатуваа за Кипар, па верува дека ќе може да се оствари поволен резултат и со видно изменетиот тим, во кој со исклучок на Ристовски, Велковски и Муслиу, ниту еден не беше стартер на историскиот меч со Грузија.

На голот ќе биде Шишковски, во стоперската тројка друштво на Велковски и Муслиу ќе им прави Зајков, а за десен бек е поставен Бејтулаи.

Стефан Ристовски одново ќе ја зазема левата бековска страна и ќе делува во одбрана и напад како со Естонија, додека за централни играчи во средината се поставени Тотре и Костадинов.

Во нападот, Ангеловски им даде шанса на тројца играчи, а покрај Трајковски, денеска во офанзивата се наоѓаат уште Стојановски и Тричковски. Само за потсетување, на натпреварот со Ерменија ни одговара и реми исход, бидејќи и со освоен бод ќе го осигураме првото место во групата.