ВАР одлуките го шокираа Клоп, Брајтон освои бод во судиското продолжение (Видео)

Јирген Клоп беше бесен на одредениот термин за одигрување на дуелот со Брајтон, а по драматичните случувања на теренот, германскиот стручњак не го криеше бесот уште по последниот судиски свиреж и имаше што да и каже на судиската четворка.

Ливерпул беше пред прокнижување на нови три бода на гостувањето на „Амекс стадионот“, но како малку да беа двата поништени гола и милиметриските ВАР одлуки, на крајот Брајтон доби и втор пенал, кој овојпат беше реализиран за комплетно разочарување кај Германецот.

Брајтон најпрво промаши пенал при резултат 0:0 преку Мопеј во 20-та минута, по што Ливерпул се разбуди и изгледаше многу подобро на теренот. Мо Салах постигна одличен гол и сите се израдуваа на истиот, но ВАР прегледот покажа дека станува збор за милиметарски офсајд, па славјето беше залудно.

Во второто полувреме, Ливерпул поведе со 0:1 и овој гол беше регуларен по одличната комбинација меѓу Салах и стрелецот Жота, а во 84-та минута, Садио Мане погоди за 0:2 и се чинеше дека Ливерпул ја осигура победа. Сепак, повторената снимка повторно покажа дека има нерегуларна офсајд ситуација, а ваквиот чуден расплет на крајот резултираше со дебела казна за гостите.

Робертсон беше невнимателен во судиското надополнување и го удри Велбек, по што судијата Атвел отиде сам да ја прегледува ситуација и повторно покажа на белата точка.

За разлика од првиот пат, овојпат прецизен реализатор беше Грос, измамувајќи го Алисон со удар по средината од голот за 1:1 во 93-та минута. Ливерпул на овој начин остана без планирани бода, а лоша вест за Клоп е тоа што се повреди и Милнер.